Չեխիայի Պլզեն քաղաքում մեկնարկեց Եվրոպայի հրաձգության վազող թիրախ մրցաձևի  առաջնությունը։

Գոհացնող ելույթ ունեցավ ՀՀ կանանց թիմը, իսկ անհատականում սպասելիքները գերազանցեց  Գոհար Հարությունյանը: Նա հաջողությամբ հաղթահարեց նախնական փուլերի արգելքները / 10 մ. հեռավորությունից /  և  մտավ եզրափակիչ:

Մեդալների համար պայքարում հայ մարզուհին ընկավ  ուկրաինուհիներով կազմված յուրատեսակ շրջափակման մեջ: Բայց անկոտրում երևանցին  մնաց աներեր.  դրսևորեց նախանձելի դիպուկություն, վաստակեց 552 միավոր,  խոշոր ՝ 6 : 1 հաշվով << ջախջախեց պատնեշը >>  ու նվաճեց Հին աշխարհամասի չեմպիոնուհու կոչումը:    

Մեր մյուս մարզուհիներից Արուսյակ Գրիգորյանը 550 միավորով ճանաչվեց հինգերորդը, իսկ Լիլիթ Մկրտչյանը 547 միավորով՝   յոթերորդը:

Տղամարդկանց պայքարում Հովհաննես Մարգարյանը զբաղեցրեց 12 –րդ հորիզոնականը /  556 միավոր /:

Գոհար Հարությունյան,  Լիլիթ Մկրտչյան,  Արուսյակ Գրիգորյան  եռյակը վաստակեց 1649 միավոր և  արծաթե պարգևի արժանացավ թիմային պայքարում: